Орналасқан жері: Қазақстан, Нұр-Сұлтан
Салынған кезі: 2010 жыл
Қызықты мәліметтер: Хан шатыр әлемдегі шатыр тәріздес құрылыстардың ең орасан зоры және еліміздегі ірі сауда орталықтарының бірі болып табылады. Бұл зәулім ғимаратта ірі сауда орталықтары, концерт залдары және кинотеатр бар. Орталықтың ішінде тропикалық бақтар, гүлзарлар, субұрқақтар орналасқан. Балалардың тамаша демалысы үшін биік су сырғанақтары жұмыс жасайды.
Бейбітшілік және келісім сарайы:
Орналасқан жері: Қазақстан, Нұр-Сұлтан
Салынған кезі: 2006 жыл
Қызықты мәліметтер: Бейбітшілік және келісім сарайы – архитектуралық құрылыс кешені, сәулет өнерінің бірегей туындысы болып саналады. Ол Нұр-Сұлтан қаласында қолдан жасалған жота үстінде орналасқан. Пирамида 2006 жылдың 2 қыркүйегінде салтанатты түрде ашылды. Оның табан қабырғасының ұзындығы 62 м, ауданы 25,5 мың м².
Бәйтерек:
Орналасқан жері: Қазақстан, Нұр-Сұлтан
Салынған кезі: 30 тамыз 2002 жыл
Қызықты мәліметтер: Елордамыздың ең көрнекті ғимараттарының бірі. Есіл өзенінің сол жағалауында бой көтерген. Зәулім «Бәйтерек» биіктігі 97 м. Ол үш бөліктен тұрады. Жер асты бөлігі ұлттың тамыр жаюы, ал одан кейінгілері өркендеу кезеңдерінің нышандарын білдіреді. Ең үстінде «Аялы алақан» композициясы орын алған. Оған қол тигенде шиыршық жарық ағып түсіп, сәуле алақанға құйылады және Қазақстанның Мемлекеттік Әнұраны ойналады. Осынау ғаламат шардың панорамалық залынан астанамыздың ғажайып сәулетін тамашалауға болады.
Ақорда:
Орналасқан жері: Қазақстан, Нұр-Сұлтан
Салынған кезі: 2001-2004 жылдар аралығы
Қызықты мәліметтер: Ақорда — Қазақстан Республикасы Президентінің Резиденциясы. Ғимарат монолит құйматастан салынған. Шатырсүмбіні қоса есептегендегі ғимараттың биіктігі 80 м. Ғимарат жер бетінде 5 және жер астындағы 2 қабаттан тұрады. Жертөле қабаттарында техникалық қызмет, ас үй, асхана және көлік тұрақтары орналасқан. Жерүсті қабаттарында салтанатты холдар, қызметтік орынжайлар, екіжақты кездесу залдары қарастырылған.
Бурабай:
Орналасқан жері: Көкшетау
Қызықты мәліметтер: Көкшетау таулары үстіндегі аспан көкпеңбек нұрлы, ауасы тұнық мөлдір болғандықтан «Көкше тау» деп аталады. Осы төңіректегі атаулар Бурабай көлінің даңқымен көпке танымал болған. Бурабай көлі – емдік қасиетімен әрі әсем табиғатымен ерекшеленеді. Ешқайда қосылмайтын тұйық көл болғанымен, онда ақторта, алабұға, сазан, табан, шортан балықтары тіршілік етеді.
Қарағайлы, қайыңды орман, аңыз болған Жұмбақтас, біріне-бірі жақын жатқан Көкшетаудың сексен көлінің бір үзікті тізбегі – Шортанды, Үлкен шабақты, Кіші шабақты, Қотыркөл, Жөкей, Бурабай болып, тұтастай осы өңірге ерекше сипат береді.
Шарын шатқалы:
Орналасқан жері: Алматы облысының Еңбекшіқазақ, Райымбек ауданында
Қызықты мәліметтер: Алматы облысы, Райымбек ауданында орналасқан Шарын шатқалы - Қазақстанның көрікті жерлерінің бірі. Шарын шатқалы табиғатының әсемдігі мен көзтартар ерекше сұлулығымен белгілі. Шарын шатқалы Қазақстан табиғатының інжу-маржаны болып есептеледі, оның құрамына өзi аттас өзенмен қоса шетендi тоғай кіреді. Шетен тоғайының негiзiн соғдиян шетенi құрайды. Ол қазiргi өсiмдiктер iшiндегi ең көне түрге (динозаврлар дәуiрiнiң жұрнағы) жатады. Шетен тоғайы Шарын шатқалындағыдай шоқ болып әлемнiң тек екi жерiнде – Қазақстан мен Солтүстiк Америкада ғана сақталған.
Көлсай:
Орналасқан жері: Алматы облысы Райымбек ауданы
Қызықты мәліметтер: «Көлсай көлдері» Мемлекеттік ұлттық табиғи паркі 2007 жылы
құрылды. Парк территориясында теңіз деңгейінен 1800-3500 метр жоғары өсетін өсімдіктер мен жануарлар дүниесі,
керемет өзендер мен көлдер кездеседі.
Ауа-райы демалу және сауықтыру үшін ыңғайлы, оған сәйкес қысы жұмсақ, ауасы таза, қысқы демалыс түрлері үшін қолайлы. Көлсай көлдеріне
жаяу және атты маршруттармен,автокөлікпен баруға болады.
Көлсай өзенінің ағымында үш көл орналасқан: Жоғарғы Көлсай, Ортаңғы Көлсай, Төменгі Көлсай.
«Медеу» мұз айдыны
Орналасқан жері: Қазақстан, Алматы
Салынған кезі: 1949 - 1951 жж.
Қызықты мәліметтер: Медеу – жасанды мұз айдыны бар дүние жүзіндегі ең ірі спорт кешені.
Алматы қаласынан 18 км жерде, Кіші Алматы шатқалында, теңіз деңгейінен 1691,2 м биіктікте орналасқан. Табиғи мұз айдыны ретінде 1951 ж. бастап пайдаланыла
бастады. 1972 ж. "Медеу" Спорт Кешені тұрғызылды. Конькишілерге арналған жасанды мұз айдынының ауд. 10,5 мың м2.
Каспий теңізі
Орналасқан жері: Еуропа мен Азия аралығында орналасқан жер шарындағы ең үлкен тұйық көл.
Қызықты мәліметтер: Каспий теңізі неоген дәуірінің (4-3 млн. жыл бұрын) аяғында жер қыртысының көтерілуінен Қара теңізден бөлінді.
Бұл кезді Каспий теңізінің пайда болған уақыты деп есептеуге болады. Каспий теңізінің жалпы ауданы 376 мың км2. Оның беті теңіз деңгейінен 28 м төмен жатыр.
Теңіз солтүстіктен оңтүстікке қарай 1200 км-ге созыла орналасқан. Теңіздің ендірек жері - 435 км, ал енсіз жері - 193 км.
Каспий теңізінің жағалау сызығының ұзындығы - 7000 км.
